कीर्तिपुरस्थित त्रिभुवन विश्वविद्यालयको क्रिकेट रंगशालामा सम्पन्न पहिलो जय नेपाल कप क्रिकेट प्रतियोगिताको उपाधि नेपालका मध्यपश्चिम विश्वविद्यालयले जितेको छ। फाइनल खेलमा मध्यपश्चिम विश्वविद्यालयको टोलीले भारतको लखनऊ विश्वविद्यालयलाई ५८ रनले पराजित गर्दै उपाधि आफ्नो हात पारेको हो।
फाइनल खेलपछि पूर्व प्रधानमन्त्री शेरबहादुर देउवाले विजेता मध्यपश्चिम विश्वविद्यालय र उपविजेता लखनऊ विश्वविद्यालयलाई ट्रफी र पदक प्रदान गर्नुभयो।
टस जितेर ब्याटिङ रोजेको मध्यपश्चिम विश्वविद्यालयले निर्धारित २० ओभरमा ६ विकेट गुमाउँदै १७५ रनको उत्कृष्ट स्कोर खडा गर्यो।
१७५ रनको लक्ष्य पछ्याउन मैदानमा उत्रिएको लखनऊ विश्वविद्यालयको टोली २० ओभरमा ९ विकेट गुमाएर केवल ११७ रनमै रोकियो।
प्रतियोगितामा मध्यपश्चिम विश्वविद्यालयका विपिन खत्रीलाई ११ विकेटसहित सर्वोकृष्ट बलर र ‘प्लेयर अफ द टुर्नामेन्ट’ घोषित गरियो।
नेपाल विद्यार्थी संघद्वारा आयोजित उक्त प्रतियोगितामा तीन देशका आठ विश्वविद्यालयका टोलीले भाग लिएका थिए।
प्रतियोगिताले नेपालको विश्वविद्यालय क्रिकेटलाई नयाँ उचाइमा पुर्याउने विश्वास गरिएको छ।
