मुगु ।

मुगु जिल्लाको निर्वाचन क्षेत्र ‘क’ अन्तर्गत मुगम कार्मारोङ गाउँपालिका मह र माङ्ग्रि क्षेत्र जोड्ने ऐतिहासिक पुल निर्माण हुने भएको छ । करिब ४१० मिटर लामो उक्त पुल कर्णाली प्रदेशकै सबैभन्दा लामोमध्ये एक र देशभरमै विशेष संरचनाका रूपमा रहने अनुमान गरिएको छ ।

जिल्ला पूर्वाधार विकास कार्यालय मुगुले उक्त पुलका लागि टेन्डर आह्वान गरिसकेको छ । ‘टर्न–की’ मोडेल (डिजाइन र निर्माण एउटै प्याकेजमा) निर्माण हुने यो परियोजनालाई जिल्लाको पूर्वाधार विकासमा महत्वपूर्ण उपलब्धिका रूपमा हेरिएको छ ।

निर्माणपछि मह र माङ्ग्रि क्षेत्रका बस्तीहरूबीच आवत–जावत सहज हुने, शिक्षा तथा स्वास्थ्य सेवामा पहुँच बढ्ने र दैनिक उपभोग्य वस्तुको ढुवानी सरल बन्ने अपेक्षा गरिएको छ । साथै स्थानीय कृषि उत्पादन जस्तै चिनो, काउनी, फापर, कोदो, मकै, आलु, सिमी, गहत र भट्ट जस्ता रैथाने बालीहरूको बजारिकरणमा समेत सहजता आउने विश्वास गरिएको छ ।

हाल कठिन भौगोलिक अवस्थाका कारण यातायात सेवा सीमित रहेको क्षेत्रमा यो पुल बनेपछि सदरमुकामदेखि गाउँपालिका र चीन सीमासम्मको आवत–जावत सहज हुने अनुमान छ ।

त्यसैगरी रारा–गमगढी–छायानाथ पर्यटकीय मार्गमा समेत यो संरचनाले पर्यटन प्रवर्द्धनमा नयाँ अवसर सिर्जना गर्ने स्थानीयले बताएका छन् । पुल बनेपछि आन्तरिक तथा बाह्य पर्यटकहरूको आकर्षण बढ्ने र स्थानीय व्यापार–व्यवसायमा समेत सकारात्मक प्रभाव पर्ने अपेक्षा गरिएको छ ।

यो परियोजनालाई कर्णाली प्रदेशका पूर्वमन्त्री तथा माननीय जितबहादुर मल्लको पहलमा अघि बढाइएको जनाइएको छ ।